Gaytgyl

Gaytgyl

Serdar, mundan gitsen Tähran ýurdyga,

Sanyn bergen malyn sür-de gaýtgyl!

Ýene gaýdyp öýli oglan dilese,

«Bitmez» diýip, jogabyn ber-de gaýtgyl!

Men biler men gyzylbasyn alyny,

Çekin hazynasyn, urun malyny, .

Üç ýüz öýli ýigitlerin halyny,

Ne sylagy baryn gör-de gaýtgyl!

Ynangyl sözüme, hergiz lap emes,

On gyzylbas bir türkmene tap emes,

Bilsen gyzylbasyn könli sap emes,

Kerweni ýoluksa, ur-da gaýtgyl!

Dostum, yrak bolgul beýle mähnetden,

Gaçawergil sa gazapdan, töhmetden,

Tährandaky üç ýüz öýli ýomutdan

Gelerin, gelmezin bil-de gaýtgyl!

Magrupy diýr, arzym anda ýetirsen,

Ýarlygymny sa aldynda ötürsen,

Gyzylbas ýörese, habar getirsen,

«Bähbit» diýip, tizden bar-da gaýtgyl!

Türkmen şahyry: Magrupy  (ماغروپی (معروفی