Başy gerek

Başy gerek

Eý ýaranlar, goç ýigidiň

Bir dil bilen başy gerek;

Ýa gylygy, ýa gylyjy,

Gazan içre aşy gerek.

Haky özüňe kyl dalda,

Bolmagyl özge hyýalda,

Ýa ogulda, ýa aýalda

Bir köňlüniň hoşy gerek.

Bir goç ýigidiň aşyna,

Deň-duşy gelse daşyna,

Ýowuz gün düşse başyna,

Jan köýer gardaşy gerek.

Arşa çykar perýatlaryň,

Hiç kim eşitmez datlaryň,

Hakykat perizatlaryň

Gözi bilen gaşy gerek.

Belli, alyjy ärleriň,

Rüstem Zal dek pälwanlaryň,

Magrupy diýr, çyn pirleriň

Gözleriniň ýaşy gerek.

Türkmen şahyry: Magrupy  (ماغروپی (معروفی